Duke ju referuar vendimeve të reja të qeverisë kosovare, Kurti tha se nuk brengoset rreth asaj se si shihet në terma të vendimmarrjes së pavarur, pasi që “Kosova është shumë më e pavarur se Serbia” dhe se “Serbia është shumë më shumë e varur nga Rusia”.
Ai madje për BBC serbe, nuk ka përjashtuar mundësinë edhe të një marrëveshjeje tjetër në takimin e ardhshëm me presidentin serb, Aleksandar Vuçiq në Bruksel.
”1 Shtatori do të jetë një ditë normale në pikat kufitare – ose do të nxjerrim dokumente hyrje-dalje, ose të dyja palët do t’i anulojnë ato”, tha Kurti.
”Prishtina do të vazhdojë fushatën për ndërrimin e targave, Beogradi është i shqetësuar sepse mendon se njerëzit do ta pranojnë”, ka thënë kryeministri Kurti mes tjerash.
Ndërsa në lidhje me rolin e Bashkimit Evropian si fascilitues të dialogut për normalizim të marrëdhënieve me Serbinë, Kurti tha se ata “do të mund të ishin më aktiv e më të qartë”.
Sa i përket çështjes së Udhërrëfyesit për Zbatimin e Marrëveshjes për Energjinë, Kurti ka deklaruar se pala kosovare i kreu obligimet e saj “për dy ditë” derisa Beogradi “nuk e bëri as për tetë javë”, përcjellë teve1.info.