Kryeministri i rizgjedhur i Kosovës, Albin Kurti, ka falënderuar qytetarët e vendit për mbështetjen e dhënë ndaj Lëvizjes Vetëvendosje në zgjedhjet e fundit.
Përmes një postimi në Facebook, Kurti ka premtuar se puna do të vazhdojë dhe se siguria e begatia do të rriten për qytetarët e vendit.
“Në dhjetë ditë fushatë, dhjetëra mijëra duar të shtrënguara e mijëra dyer të hapura nga ju në qindra takime e tubime anembanë. Na pritët me ngrohtësi e besim, e për këtë ju falënderoj përzemërsisht. Jeni shumë, madje aq shumë sa shumicës nuk ua njohim e dimë emrin. Dhe, u angazhuat pa kursim për fitoren e VETËVENDOSJE!-s me partnerë, për fitoren tuaj”, ka shkruar Kurti.
Ai ka falënderuar veçanërisht bashkatdhetarët që votuan nga Evropa, Amerika dhe nga çdo cep i botës, si dhe ata që votuan me postë apo fizikisht në ambasadat dhe konsullatat e Kosovës.
“Të dashur bashkatdhetarë që erdhët nga Evropa, Amerika e nga çdo cep i botës, ose që votuat me postë apo fizikisht pardje në ambasadat e konsullatat tona, u jemi mirënjohës përjetë për kontributin tuaj të pamatshëm për liri e shtet dhe komb, si dhe për përkrahjen vendimtare që e bëri fitoren në këto zgjedhje aq madhështore saqë historike. Puna vazhdon, siguria e begatia do të shtohen. Na priftë e mbara” ka përfunduar Kurti./teve1.info/
