Kryeministri i Kosovës, Albin Kurti sot ka takuar homologun e tij bullgar, Nikolai Denkov, në Davos.
Gjatë këtij takimi, Kurti ka falënderuar homologun e tij bullgar për mbështetjen që Bullgaria i ka dhënë Kosovës në procesin e liberalizimit të vizave si dhe kanë biseduat për marrëdhëniet bilaterale në mes dy vendeve.
“Sot në Davos, në ditën e tretë të pjesëmarrjes në Forumin Ekonomik Botëror, Kryeministri i Republikës së Kosovës, Albin Kurti, zhvilloi një takim dypalësh me Kryeministrin e Bullgarisë, Nikolai Denkov. Së bashku folën për marrëdhëniet bilaterale, për 13 marrëveshjet e nënshkruara deri më tani ndërmjet dy vendeve dhe 7 të tjera që janë në proces të finalizimit, për bashkëpunim ndërshtetëror dhe rajonal si dhe situatën e sigurisë në rajon. Kryeministri Kurti e falënderoi homologun e tij bullgar për mbështetjen që Bullgaria i ka dhënë Kosovës në procesin e liberalizimit të vizave, për përkrahjen aktive në procesin e anëtarësimit në Këshillin e Evropës dhe për kontributin në fushën e sigurisë e mbrojtjes përmes pjesëmarrjes së saj në misionin e KFOR-it”, thuhej në komunikatë.
Ndryshe, Kurti këto ditë ka udhëtuar për në Davos për të marrë pjesë në edicionin e sivjetëm të Forumit Ekonomik Botëror (WEF), ku krahas takimeve bilaterale me homologë, zyrtarë të lartë shtetërorë dhe përfaqësues të kompanive ndërkombëtare, është i ftuar edhe si folës në panele të diskutimit.
