Liderët e Ballkanit Perëndimor dhe përfaqësuesit e Bashkimit Evropian sot diskutojnë mbi zbatimin e Planit të Rritjes për rajonin në samitin dyditor që u mbajt edhe më 30 qershor, në Shkup.
Kryeministri në detyrë i Kosovës, Albin Kurti, dhe presidenti i Serbisë, Aleksandar Vuçiq, do të jenë ndër folësit e këtij samiti.
Pjesa kryesore e takimit zhvillohet sot në “Hilton Double Tree Hotel”, ku fokusi kryesor është në vlerësimin e Planit të Rritjes, propozimet për iniciativat e reja dhe bashkëpunimin ekonomik përmes Tregut të Përbashkët Rajonal.
Samiti përfshin dy panele diskutimi dhe do të përmbyllet me një konferencë për shtyp dhe drekë zyrtare, transmeton Alsat-M.
Të pranishëm janë liderë si kryeministri i Shqipërisë Edi Rama, kryeministri në detyrë i Kosovës Albin Kurti, presidenti i Serbisë Aleksandar Vuçiq, kryeministri i Malit të Zi Milojko Spajic dhe kryetarja e Këshillit të Ministrave të Bosnjë e Hercegovinës, Borjana Krishto, së bashku me përfaqësues të BE-së, BERZH, BB dhe organizatave rajonale./teve1.info/
