Nga e marta, përmes pikës kufitare të Merdarës mund të hyjnë mallra serbe, por për hyrje të tyre do të ketë kontrolle të shtuara dhe të detajuara nga Dogana e Kosovës. Kështu ka kërkuar Ministria e Punëve të Brendshme të Kosovës gjatë së hënës. I pari i Qeverisë, Albin Kurti thotë se kjo masë e ndryshimit është e mjaftueshme për proceset e ditëve në vijim dhe e njëjta është biseduar me Bashkimin Evropian dhe Gjermaninë.
Nga e marta, produktet serbe mund të hyjnë përmes pikës kufitare në Merdarë.
Mirëpo në hyrje të tyre, do të ketë kontrolle të shtuara dhe detajuara nga Dogana e Kosovës.
Ky ndryshim nga Ministria e Punëve të Brendshme erdhi pas kërkesave të ndërkombëtareve për largim të kësaj mase të ndalimit.
Por kryeministri i Kosovës, Albin Kurti thotë se kjo masë është derisa të vijnë skanerët.
“Republika e Kosovës e ka ndërruar masën e sigurisë nga kufizimi te kontrolli i shtuar, derisa të na vijnë skanerët, në momentin që na vijnë skanerët atëherë do t’i vendosim në të gjitha pikat kufitare por derisa të na vijnë skanerët ne do ta hapim një pikë kufitare, e cila do ta ketë kontrollin e shtuar për shkak se masat që i kemi ne janë masa të sigurisë”, tha Kurti.
Kurti thotë se për ndërrimin e kësaj mase kanë folur edhe me faktorin ndërkombëtar dhe e njëjta është e mjaftueshme për proceset që vijnë ditëve në vijim.
“Këta kanë biseduar, kanë negociuar edhe me Bashkimin Evropian në veçanti me Gjermaninë dhe ne besojmë që ndryshimi i masës që e bëjmë është mëse i mjaftueshëm që pasnesër në CEFTA dhe të hënën në procesin e Bernlinit të kemi sukses të plotë”, tha ai.
E të hënën, shefi i ekzekutivit foli edhe për rrugën e dialogut në mes Kosovës dhe Serbisë.
Edhe këtë herë, Kurti bëri thirrje për nënshkrim të marrëveshjes.
“Ne e kemi një marrëveshje nuk bën ta harrojmë atë, atë që duhet të bëhet është të respektohet ajo. Interesi i Beogradit është të flitet për dialog pa u përmendur marrëveshja. Ajo çfarë insistoj unë është që të nënshkruhet ajo. Beogradi nuk mundet ta mohojë që kemi nënshkruar marrëveshje”, tha Kurti.
Qeveria e Kosovës ka vendosur masën e ndalimit për produktet serbe më 14 qershor të këtij viti, të njëjtën ditë kur Serbia i ka kidnapuar tre zyrtarë të Policisë së Kosovës brenda territorit.
Gjatë vizitës së fundit në Kosovës, i dërguari gjerman për Ballkanin Perëndimor, Manuel Sarrazin ka paralajmëruar se Kosova mund të përballet me kërkesa për përjashtim nga Marrëveshja e Tregtisë së Lirë të Evropës Qendrore (CEFTA) dhe masa të tjera ndëshkuese, nëse vazhdon të mbajë ndalimin e importit të produkteve serbe.
Samiti i dhjetë i Procesit të Berlinit mbahet më 14 tetor.
