Po i shohin nga afër disa prej sistemeve të armatimit që posedon Forca e Sigurisë së Kosovës.
Shefja e shtetit, Vjosa Osmani dhe kryeministri në detyrë, Albin Kurti po njoftohen me funksionet e armëve nga pjesëtarët e FSK-së.
Pasi panë arsenalin e armatimit të ushtrisë së Republikës krerët e shtetit morën pjesë në ushtrimin ndërkombëtar “Defender Europe 25”.
Komandantja supreme, Vjosa Osmani tha se Forca e Sigurisë së Kosovës e ka dëshmuar se është një aleat i gatshëm të bashkëpunojë me ShBA-në dhe shtetet tjera.
E kryeministri në detyrë përmendi investimin e tyre në armatimin e ushtrisë së vendit.
Derisa përgëzime për ushtarakët e Kosovës pati edhe Shefi i shtabit të ushtrisë amerikane për Evropë dhe Afrikë, Levon Cumpton.
“Aftësia për të realizuar ndërveprueshmëri dhe për të ndërtuar gatishmëri së bashku jo vetëm që siguron siguri dhe stabilitet rajonal, por ka ndikim edhe më të gjerë. Faleminderit që jeni një pritës i mrekullueshëm. Faleminderit për udhëheqjen tuaj këtu në Kosovë dhe është nder për ne të jemi pjesë e këtij bashkëpunimi”, ka thënë Cumpton.
Ndërsa Komandanti i Divizionit të 28-të të Këmbësorisë së ushtrisë amerikane, gjeneral major, Micheal Wegscheider tha se përmes këtyre stërvitjeve është demonstruar ndërveprueshmëri e plotë.
“Heronjtë e vërtetë të kësaj stërvitjeje, ku morën pjesë 18 shtete, janë populli i Kosovës, stafi dhe oficerët e FSK-së nën udhëheqjen e gjeneral Jasharit, si dhe ushtarët e FSK-së që ndodhen 5,000 metra larg në këtë luginë në jug, duke u djersitur dhe duke dëshmuar aftësitë dhe vendosmërinë e tyre të fortë”, ka thënë Wegscheider.
Në këtë ushtrim po marrin pjesë 29 shtete me mbi 25 mijë ushtarë, ku Kosova po merr pjesë me 900 pjesëtarë.
