Kryeministri i Kosovës, Albin Kurti, ka deklaruar se Kosova solidarizohet me Çekinë pas sulmit me armë zjarri në Pragë.
Kurti tha se qëndron me familjet e viktimave në këto kohë të vështira.
“Ngushëllime të përzemërta Republikës Çeke nga Republika e Kosovës. Pas të shtënave tragjike në Pragë, mendimet tona janë me viktimat, familjet e tyre dhe të gjithë komunitetin çek. Kosova solidarizohet në këto kohë të vështira”, ka thënë Kurti.
Ndërkohë, për sulmin ka reaguar edhe kryetari i Kuvendit, Glauk Konjufca.
Ai ka thënë se qëndron me popullin çek, derisa ka shtuar se shpreson që raste të tilla të mos përsëriten.
“Të tronditur nga sulmi në Pragë që la shumë viktima dhe të plagosur! Në këto momente të vështira për ta, bashkëndiejmë dhimbjen e popullit të Çekisë dhe familjarëve, duke u shprehur ngushëllimet më të thella atyre për viktimat. Qëndrojmë pranë tyre, duke uruar po ashtu shërim të shpejtë për të plagosurit dhe duke shpresuar që ngjarje të tilla të mos përsëriten kurrë askund”, ka shkruar Konjufca në Facebook.
Për sulmin ka reaguar edhe presidentja e Kosovës, Vjosa Osmani.
“Jemi me familjet e viktimave dhe me të gjithë ata që u përfshinë nga sulmi i tmerrshëm masiv në Pragë sot. Në këto momente pikëlluese, Kosova solidarizohet me qytetarë”, ka shkruar Osmani në “X”.
