Kryeministri Albin Kurti ka zhvilluar një takim bilateral me homologun nga Bullgaria, Nikolai Denkov në margjinat e Forumit Strategjik të Bledit.
Kurti e falënderoi Bullgarinë për mbështetjen e vazhdueshme ndaj Kosovës dhe përkrahjen për anëtarësim në organizata ndërkombëtare.
“Me homologun e tij bullgar, kryeministri Kurti foli për marrëdhëniet bilaterale ndërmjet dy shteteve dhe optimizimin e potencialit të bashkëpunimit sidomos në fushën e ekonomisë”, thuhet në njoftimin e Qeverisë.
Po ashtu Kurti e ka ftuar Denkovin për vizitë në Kosovë. Sipas kryeministrit Kurti, janë rreth 135 bullgarë që investojnë në Kosovë.
“Në qershor të këtij viti Oda Ekonomike Kosovë-Bullgari themeloi selinë e saj në Sofje. Numri i investitorëve bullgarë në Kosovës është rreth 135 me fuqi investuese rreth 6 milionë euro të shtrirë në disa sektorë si ai i tregtisë dhe shërbimeve, turizmit, ndërtimtarisë, teknologjisë së informacionit dhe transportit”, thuhet në njoftim.
