Kryeministri Albin Kurti nuk ka dashur ta komentoj shumë deklarimin e ministrit Liburn Aliu, se Kosova është një projekt i përkohshëm, derisa ka thënë se sipas informatave që i ka, ai ka qenë një emision festiv, raporton teve1.info
Kurti, i pyetur në Gjilan nëse mendon se Kosova është projekt i përkohshëm sikurse ministri Aliu, tha se nuk dëshiron ta komentoj deklaratën pasi sipas tij nuk e ka parë emisionin.
Megjithatë, Kurti shtoi se sipas zëdhënësit të Qeverisë, Përparim Kryeziu, diskutimi i Aliut ka ndodhur në një emision festiv, derisa shtoi se sot në Gjilan ka shkuar për punët që po bëhen për qytetarët e kësaj komune.
“Nuk më duket e përshtatshme të bëjë komente për emisione televizive të cilin nuk e kam parë. Por zëdhënësi Përparim Kryeziu më tha se ka qenë emision festiv. Këtu sot jemi në Gjilan për punët që po bëhen për qytetarët, në të mirën e tyre dhe besoj ky është qëndrimi ynë sot”, tha Kurti.
Ai foli edhe për përkrahjen e shqiptarëve në zgjedhjet e Serbisë, për çka tha se Qeveria e Kosovës do të vazhdoj përkrahjen e tyre, por shtoi se nuk mund të parashikoj sa mandate mund t’i fitojnë shqiptarët atje, pasi sipas tij, Serbia nuk është vend demokratik sikurse Kosova.
“Po e rrisim buxhetin që i dedikohet shqiptarëve në Preshevë, Bujanoc e Medvegjë dhe jemi të interesuar t’i mbështesim ata. Sa i përket zgjedhjeve që mbahen në serbi, na japim kontributin tonë që zëri dhe interesi i shqiptarëve të jenë sa më shumë të përfaqësuar dhe kjo bëhet nëpërmjet takimeve me ta dhe këshilltares time për Luginë që në këtë mënyrë të krijohet edhe bashkëpunimi i ngushët edhe organizmi sa më i madh për fitoren e sa më shumë mandateve atje. Ju e dini se Serbia nuk është vend demokratik sikurse ne por nuk dihet si do të shkojnë zgjedhjet”, tha Kurti