Kryeministri i Kosovës, Albin Kurti është takuar me ministrin e Financave të Gjermanisë, Jörg Kukies, në kuadër të Konferencës së Sigurisë në Mynih.
Sipas Zyrës së Kryeministrit në këtë takim është diskutuar për marrëdhëniet ndërmjet Kosovës dhe Gjermanisë në fushën e sigurisë dhe mbrojtjes, si dhe për mundësitë dhe rëndësinë e shtimit të shkëmbimeve tregtare, investimeve të huaja dhe bashkëpunimit ekonomik.
“Gjatë bisedës, kryeministri Kurti veçoi zbatimin e 12 profileve të arsimit dual dhe planet për shtimin edhe të 10 të tjerave për të zgjeruar lidhjet ndërmjet shkollimit profesional dhe tregut të punës, përkatësisht arsimit me ekonominë, rolin e diasporës sonë për forcimin e urave ndërmjet dy vendeve, dhe progresin, ofertën për investitorë të huaj dhe përparësitë e sektorit te teknologjisë në Kosovë”, thuhet në komunikatë.
Po ashtu thuhet se Kurti ka shprehur mirënjohje për kontributin dhe mbështetjen e vazhdueshme të Gjermanisë ndaj Kosovës.
