Kryeministri i Kosovës Albin Kurti, në konferencë për medie ka deklaruar se shefi i zyrës ndërlidhëse të Kosovës në Serbi, Jetish Jashari ka vizituar sot tre policët e rrëmbyer nga Serbia në territorin e Kosovës.
Kurti tha se takimi është zhvilluar ndaras njëri pas tjetrit, teksa theksoi se përshkrimi i tre policëve se si ka ndodhur rrëmbimi ka qenë i njëjtë.
“Ne jemi në komunikim të vazhdueshëm me zyrën ndërlidhëse të Republikës së Kosovës në Serbi me shefin e zyrës, ambasadorin Jetish Jashari. Ai ka qenë në kontakt me institucionet atje në përpjekje për të marrë sa me shumë informacione për gjendjen e policëve të rrëmbyer. Ambasadori Jashari sot i ka vizituar të tre policët, i ka vizituar ndaras njërin pas tjetrit përshkrimi i këtyre policëve se si ka ndodhur rrëmbimi është i njëjtë, janë tri rrëfimë ndaras identike të tre njerëzve të cilët thonë se në momentin e rrëmbimit me 14 qershor kanë qenë tek tryeza e improvizuar për ngrënie, pra kanë qenë duke ngrënë drekë”, tha ai.
“15 persona i kanë rrethuar, i kanë sulmuar, dhe i kanë rrëmbyer. Të tre kanë qenë bashkë dhe që të tre e thonë rrëfimin e njejtë kur pyeten ndaras nga njëri tjetri nga ambasadori ynë Jetish Jashari. Kjo heq çfarëdo dileme edhe për ata të cilët dëshirojnë të jenë skeptik për të drejtën e Kosovës se Serbia ka zhvilluar agresion me 14 qershor dhe ka rrëmbyer tre policët tanë”, ka thënë Kurti.
Këtë rrëmbim Kurti e ka cilësuar si hakmarrje nga ana e Serbisë për arrestimin e Milun Milenkoviq-Llune.
“Serbia përdori instrumentin më qyqar, atë të rrëmbimit të tre zyrtarëve policorë. Për harkmarrje ç’njerëzore kemi kërkuar denoncim të hapur nga gjithë partnerët tanë”, tha Kurti.
Teksa shtoi se policët e Kosovës duhet të lirohen menjëherë, pa kushte e të pacenuar, derisa ftoi SHBA-në e Bashkimin e Evropian ta dënojnë rrëmbimin./teve1.info./
