Në ditën e katërt të fushatës për zgjedhjet lokale të 12 tetorit, kryeministri në detyrë, Albin Kurti, dhe kryetari aktual i Kamenicës, njëherësh kandidat i LVV-së për një mandat të dytë, Kadri Rahimaj, vizituan disa zona të kësaj komune.
Njëra prej ndalesave ishte në fshatin Roganë, ku u prezantuan disa prej projekteve të realizuara gjatë mandatit të Rahimajt. Në mesin e tyre përmenden ndërtimi i një fushe sporti dhe i një çerdheje të re, rinovimi i shkollës “Metush Krasniqi”, asfaltimi i disa rrugëve, si dhe kyçja në ujësjellës.
Po ashtu, në njoftimin e shpërndarë nga Vetëvendosje theksohet edhe ndërtimi i stadiumit të atletikës, shënjimi i shtigjeve në Parkun e Roganës dhe mbështetja për 30 biznese vendore me grante komunale.
“Të gjitha këto janë investime që po sjellin ndryshim të dukshëm”, thuhet në reagimin e partisë, ku Rogana përshkruhet si “dëshmi e zhvillimit në komunën e Kamenicës”.
Vizita e Kurtit dhe Rahimajt vjen në kuadër të takimeve me qytetarë dhe prezantimit të projekteve të realizuara në prag të zgjedhjeve lokale.
