Kryeministri i Kosovës, Albin Kurti, gjatë ditës së sotme është takuar me presidentin e Bullgarisë, Rumen Radev, i cili po zhvillon vizitën e tij të parë në Kosovë.
Kurti gjatë këtij takimi ka thënë se Kosova është mirënjohëse për mbështetjen e Bullgarisë, qysh edhe në vitin 1999.
“Falënderoj Bullgarinë për mbështetjen e vazhdueshme për anëtarësimin tonë në organizatat ndërkombëtare, integrimin në BE, Këshillin e Evropës dhe në bashkëpunimin rajonal, duke përfshirë Procesin e Berlinit. Kënaqësi e madhe t’iu kemi këtu, mirëserdhët,” tha kryeministri.
Ndërkohë, presidenti Radev ka thënë se kanë ardhur me një mision të qartë.
Ai ka deklaruar se kanë ardhë për të thelluar miqësinë dhe marrëdhëniet në të gjitha fushat e mundshme.
“Ne kemi ardhur këtu me një mision të qartë: për të thelluar miqësinë dhe marrëdhëniet tona në të gjitha fushat e mundshme me interes të përbashkët, dhe për t’iu inkurajuar dhe mbështetur në përpjekjet tuaja për zhvillimin e Kosovës, si një shtet modern, demokratik, të pavarur e të integruar plotësisht në sistemin e komunitetit ndërkombëtar”, ka thënë ai.
Radev ka theksuar që Bullgaria është në vendi mik i Kosovës dhe se është i interesuar që të rritet dhe thellohet bashkëpunimi dypalësh duke veçuar sektorët e energjisë, edukimit dhe turizmit.
“Në takim u vlerësua hapja e Odës Ekonomike Kosovë-Bullgari këtë qershor si dhe planifikimi i mbajtjes së Forumit të përbashkët Ekonomik vitin e ardhshëm, si një mundësi e mirë për të rritur raportet ekonomike”, thuhet në njoftimin e Zyrës së Kryeministrit./teve1.info/
