Kryeministri në detyrë, Albin Kurti, ka pritur sot në takim shefin e Zyrës së Bashkimit Evropian në Kosovë, Aivo Orav, me të cilin ka diskutuar për procesin e integrimit evropian dhe bashkëpunimin ndërmjet Kosovës dhe BE-së.
Sipas njoftimit nga Zyra e Kryeministrit, Kurti ritheksoi përkushtimin e plotë të Qeverisë së Kosovës për rrugëtimin drejt Bashkimit Evropian dhe angazhimin në zbatimin e reformave që ndihmojnë këtë proces.
Në takim u diskutua edhe për aktualitetin politik në vend, ku Kurti theksoi rëndësinë e konstituimit të Kuvendit, si një hap i domosdoshëm për formimin e institucioneve të reja pas zgjedhjeve të 9 shkurtit. Ai potencoi se vazhdimi i punës së legjislativit është i nevojshëm për miratimin e marrëveshjeve ndërkombëtare kyçe, përfshirë marrëveshjen për Planin e Rritjes, që lidhet ngushtë me agjendën evropiane të Kosovës.
Pjesë e diskutimit ishte edhe bashkëpunimi rajonal dhe roli i Bashkimit Evropian në përkrahjen e vendeve të Ballkanit Perëndimor. Në këtë kontekst, u përmend edhe takimi i liderëve të rajonit për Planin e Rritjes së BE-së, i mbajtur javën e kaluar në Shkup.
