Kryeministri i Kosovës, Albin Kurti, gjatë një bisede telefonike që ka pasur të premten me këshilltarin e lartë të Departamentit amerikan të shtetit, Derek Chollet, ia ka konfirmuar atij gatishmërinë për takime të radhës të nivelit të lartë politik në kuadër të dialogut.
Përmes një njoftimi nga Zyra e Kryeministrit, kanë thënë se Kurti ka biseduar me Chollet për propozimin evropian për të cilin thotë se është i pranueshëm si bazë të mirë për bisedime të mëtejme.
“Kryeministri i Republikës së Kosovës, Albin Kurti zhvilloi dje një bisedë telefonike me Këshilltarin e lartë të Departamentit amerikan të Shtetit, Derek Chollet. Diskutuan për propozimin evropian, të pranueshëm si bazë të mirë për bisedime të mëtejme dhe platformë solide për të ecur përpara drejt normalizimit të plotë të marrëdhënieve ndërmjet Kosovës dhe Serbisë në kuadër të dialogut në Bruksel. Gjithashtu, u theksua rëndësia e avancimit për Kosovën në integrime ndërkombëtare në kohën kur të arriturat demokratike dhe ekonomike të Kosovës në këto dy vitet e fundit janë evidentuar nga shumë organizata e institute ndërkombëtare prestigjioze”, është bërë e ditur në komunikatë.
Sipas njoftimit, Kurti ka shprehur pajtimin e tij për nevojën që të intensifikohet procesi i dialogut me Serbinë.
“Kryeministri Kurti konfirmoi gatishmërinë e tij për takime të radhës të nivelit të lartë politik dhe shprehu pajtimin e tij për nevojën për intensifikim të procesit të dialogut. Republika e Kosovës mbetet e përkushtuar dhe konstruktive në dialog sepse dëshiron marrëdhënie të mira fqinjësore dhe integrim në BE dhe NATO”, thuhet më tej në komunikatën e Zyrës së Kryeministrit. /Teve1.info
