Kryeministri i Kosovës, Albin Kurti, tha se buxheti komunal për vitin 2024 do të jetë 742 milionë Euro apo 200 milionë Euro më shumë se në qeverinë e mëparshme, raporton teve1.info
Gjatë fjalimit të tij në mbledhjen e Qeverisë, Kurti tha se edhe grantet për komuna që do të ndahen vitin e ardhshëm kapin shifra rekorde.
“Buxheti i përgjithshëm komunal për vitin e ardhshëm arrin vlerën prej 742 milionë euro, që i bie gati 200 milionë euro më shumë buxhet për komuna gjatë qeverisjes sonë sesa gjatë qeverisë së mëparshme, apo rritje mbi 35%.
Ndërkaq, Granti i Përgjithshëm për Komuna për vitin 2024 kapë shumën prej 284.7 milionë euro, e që paraqet vlerën më të madhe ndonjëherë për këtë grant. Kjo vlerë rekorde e Grantit të Përgjithshëm vjen si rezultat i drejtpërdrejtë i rritjes së të hyrave në Buxhetin e Shtetit.
Rritje ka edhe në Grantin specifik për Shëndetësi dhe Grantin specifik për Arsim. Granti për Shëndetësi për vitin 2024 ka rritje prej 16% krahasuar me vitin 2023, apo 11.5 milionë euro, ndërsa Granti për Arsim është rritur për 18.5%, apo 37 milionë euro”, tha Kurti.
Sipas tij, në mbledhjen e Komisionit të Granteve, është miratuar buxheti me rritje edhe për Grantin e Kryeqytetit me afro 12% krahasuar me vitin 2023, si dhe Financimin për teatrot me rritje prej 80%.
Kurti tha se javën e ardhshme do të mbahet takimi i radhës me Kryetarët e Komunave, me qëllim mirëmbajtjen e komunikimit mes nivelit qendror dhe atij lokal dhe për të diskutuar për çështje me interes për qytetarët.
