Kryeministri i Kosovës, Albin Kurti ka rënë pre e dy komedianëve rusë të njohur si Vovan dhe Lexus, duke menduar se po komunikonte në telefon me presidentin e Letonisë.
Analisti, Selam Shkodra në emisionin “Këndi i Debatit” në Tëvë1 e ka quajtur naivitet të skajshëm të kryeministrit Kurti përmbajtjen e bisedës gjatë kësaj telefonate.
Sipas Shkodres nëse telefonata është dakorduar mes stafeve për t’ia uruar fitoren kryeministrit të vendit temat tjera nuk është dashur të diskutohen.
“Mungesë e theksuar e përvojës së stafit të kryeministrit dhe vetë kryeministrit deri në një injorancë të skajshme. Nëse telefonata është dakorduar mes stafeve për t’ia uruar fitoren kryeministrit të vendit ku kanë zënë vend këto temat tjera me u diskutu në atë telefonatë uruese, duke përfshirë edhe sasitë e armatimit, llojit të armatimit marrëveshjet dhe preferencat me shtetet të cilat Kosova ka afërsi në këtë rrafshin e armatosjes së vendit, relacionet me opozitën premtimet e opozitës dhe të tjera. Për pikëpamjen time një naivitet i skajshëm, i paparë i kryeministrit Kurti jo për që ka rënë pre e kësaj telefonate por për atë që kanë biseduar. Po kjo është kur e krijon njëfarë përshtypje që je superior në cdo gjë mundesh me pësu edhe më keq sesa kjo Asnjë justifikim nuk ka për përmbajtjen e bisedës së kryeministrit të vendit “, ka thënë ai.
Qeveria e Kosovës ka pranuar se kryeministri i Kosovës, Albin Kurti ka rënë pre e mashtrimit të komedianëve rusë. Ata kanë thënë se kanë mashtruar Kurtin që mendonte se po fliste me presidentin e Letonisë.
Në një reagim të Qeverisë, thuhet se ngjarja ka ndodhur më 11 shkurt, në një periudhë kur Kurti sipas tyre po pranonte mesazhe të shumta urimi pas fitores në zgjedhjet e 9 shkurtit.
“Ngjarja ka ndodhur më 11 shkurt, pak pas zgjedhjeve të 9 shkurtit, në një periudhë kur kryeministri Kurti po merrte mesazhe të shumta urimi dhe thirrje për rezultatin e zgjedhjeve. Për shkak të kufizimeve kohore, nuk ishte gjithmonë e mundur të kryhej verifikimi i plotë i çdo telefonate”, thuhet në reagim.
