Një bashkatdhetar i cili dëshiron të investojë në Kosovë tashmë e ka mundësinë përmes kësaj nisme.
“Dritarja për Investime të Diasporës” parasheh garantimin e kredive investuese për mërgimtarët që vijnë në Kosovë.
Në lansimin e saj, kryeministri i Kosovës, Albin Kurti tha se nga regjistrimet e fundit të popullsisë doli se ka shumë banesa të mërgimtarëve të pabanuara.
Me këtë iniciativë të re ekonomike, Kurti pret që ata të kthehen për të jetuar në Kosovë, pavarësisht që të dhënat e ASK-së treguan që në këtë regjistrim ka rënë numri i popullsisë.
Për rëndësinë e kësaj dritare foli edhe ministri i financave, Hekuran Murati.
Në lansimin e kësaj iniciative mori pjesë edhe ambasadori i Shteteve të Bashkuara të Amerikës në Kosovë, Jeffry Hovenier.
“Qeveria amerikane është krenare që ka ndihmuar në themelimin e këtij programi të ri, sepse kuptojmë mundësinë e rrallë që bizneset nga diaspora prezantojnë. Kur ndërmarrësit nga diaspora kthehen në vend dhe investojnë, ata sjellin më të mirën e botës këtu në vendin e tyre”, tha Hovenier.
E drejtori menaxhues i Fondit Kosovar për Garanci Kreditore, Besnik Berisha ka thënë se ndikimi i diasporës në Kosovë është shumë i madh.
Deri në 100 milionë euro parashihet të arrijë tërë “Dritarja për Investime të Diasporës” ndërsa përmes saj do të mundësohet garantimi i kredive investuese deri në tre milionë euro.
