Kryeministri i Kosovës, Albin Kurti, ka kërkuar nga ndërkombëtarët që Serbisë t’i bëjnë presion për t’i larguar bazat ushtarake përreth kufirit me Kosovën.
Kurti ka deklaruar se Serbia dhe Rusia janë të ngjashme për shkak të interesit të përbashkët të tyre për t’i zgjeruar territoret.
Kryeministri në një intervistë për CNN ka shtuar se Serbia pret një mundësi për t’u futur në Kosovë dhe se këtë duhet ta parandalojnë partnerët perëndimorë.
“Fqinji ynë Serbia është shumë agresiv ndaj Kosovës, fillimisht duke mos e njohur si shtet të pavarur. Krahas kësaj është e angazhuar në luftë hibride dhe bën stërvitje ushtarake në kufi. Ka 48 baza operative përreth kufirit duke pritur për një dritare mundësie. Ajo çfarë kërkojmë nga partnerët perëndimorë është që t’i bëjnë presion Beogradit që t’i tërheqin këto baza, që secila që ka 50-150 ushtarë. Nëse flasim nga aspekti politik, Serbia është e ngjashme me Federatën Ruse. Ata nuk njohin de facto dhe de juro në të vërtetë fqinjët e tyre sepse ata duan zgjerim”, ka thënë Kurti.
