Kryeministri në detyrë i Kosovës, Albin Kurti të enjten ka bërë homazhe në Poklek në 26-vjetorin e masakrës së Poklekut.
Sipas Zyrës së Kryeministrit, pas homazheve Kurti i shoqëruar nga deputetë të zgjedhur të Kuvendit kanë vizituar Shtëpinë Muze të Familjes Muqolli, brenda së cilës ruhen kujtimet për të vrarët në masakrën makabre.
Në komunikatë thuhet se kjo shtëpi është e realizuar me mbështetjen institucionale të Qeverisë së Kosovës.
Më 17 prill 1999, forcat e armatosura të Serbisë i vranë 53 civilë shqiptarë. 25 prej të vrarëve ishin nën moshën 18 vjeçare. Prej tyre 18 ishin më të vegjël se 12 vjeç. Në mesin e tyre pesë foshnje, prej gjashtë muaj e deri në dy vjeç. Pasi i vranë, forcat serbe u kthyen dhe i dogjën kufomat dy herë.
