Kryeministri i Kosovës, Albin Kurti, thotë se Kosova e meriton anëtarësimin në BE.
Kurti thotë se Evropa është kontinenti i Kosovës, dhe se Bashkimi Evropian është fati saj.
Kryeministri përmes një postimi ka përmendur disa të arritura të Ministrisë së Punëve të Jashtme, duke cekur realizimin e 500 takimeve zyrtare jashtë vendit.
“Ministria e jonë e Punëve të Jashtme realizoi mbi 500 takime zyrtare jashtë vendit. Vendi ynë mirëpriti 60 vizita të delegacioneve të larta, dhe morëm pjesë në afër 50 Konferenca ndërkombëtare. Nënshkruam 109 marrëveshje ndërkombëtare dhe 123 memorandume, protokolle dhe marrëveshje ndërinstitucionale me shtete të ndryshme”, ka shkruar Kurti në Facebook.
Kryeministri, tutje ka thënë se është vërtetuar orientimi euro-atlantik, ku Kosova u rreshtua me demokracitë e botës në dënimin e agresionit rus ndaj Ukrainës, dhe vendosjen e sanksioneve ndaj Federatës Ruse.
“Mirëmbajtëm marrëdhënie të afërta e partneriteti me aleatët tanë. Dëshmuam vlerën, mirënjohjen dhe gatishmërinë për të qenë në krah të Shteteve të Bashkuara të Amerikës me rastin e strehimit të refugjatëve afganë. Vërtetuam orientimin tonë euro-atlantik kur u rreshtuam me demokracitë e botës në dënimin e agresionit rus ndaj Ukrainës dhe vendosjen e sanksioneve ndaj Federatës Ruse. Treguam fisnikërinë dhe mikpritjen tonë duke pranuar dhe mbështetur financiarisht deri më tani 18 gazetarë ukrainas dhe pesë gazetarë afganë”, ka shkruar mes tjerash i pari Qeverisë.
Ndërkohë, Kurti thotë se politika e jashtme është reflektim i qeverisjes së brendshme.
“Ligjshmëria, reformat, luftimi i korrupsionit dhe praktikave korruptive dhe qeverisja e mirë, u vërejtën dhe u vlerësuan nga të gjithë partnerët tanë brenda Bashkimit Evropian, përfshirë edhe disa vende hezituese kur vinte puna te liberalizimi i vizave për Kosovën. Me qeverisjen tonë dhe pas votimit përfundimtar të Parlamentit Evropian, tanimë është e qartë, nga data 1 janar 2024, qytetarët e Kosovës do të kenë mundësi që të udhëtojnë lirshëm në zonën Shengen”./teve1.info/
