Kryeministri i Kosovës, Albin Kurti, nga samiti i BE-së në Shkup ka thënë se duhet të ndahet procesi i anëtarësimit të Kosovës në BE nga procesi i normalizimit të marrëdhënieve me Serbinë.
“Duhet të ndahet procesi i anëtarësimit të Kosovës në BE nga procesi i normalizimit të marrëdhënieve me Serbinë. E kuptoj se BE-ja në thelb e ka fqinjësinë e mirë, por duhet kuptuar se nuk është kollaj të normalizohen marrëdhëniet me një shtet që nuk e ka prioritet as perëndimin as demokracinë’, ka thënë Kurti.
Kurti ka folur edhe për masat ndaj Serbisë, duke thënë se ato nuk janë tregtare por janë masa të sigurisë.
“Ne nuk kemi masa tregtare ndaj Serbisë, kemi masa të sigurisë. Në vitin 2023 tri herë kemi pasur sekuestrime në veri të Kosovës”, ka deklaruar Kurti për media pas konferencës së samitit.
Tutje ai ka thënë se nuk do të ndodh heqja e masave të sigurisë përderisa ka grupe paramilitare.
“I gjithë ky armatim është prodhuar ne Serbi dhe ka ardhur nga Serbia. Për shkak të kontrollave të shtuara, ka mundësi që ndërmarrjet e caktuara nuk janë të interesuara të kalojnë kufirin në Kosovë sikurse dikur. Masat e sigurisë nuk jemi të gatshëm t’i tërheqim derisa kemi grupe paramilitare”, ka deklaruar ai.
Ndërsa ka thënë se plani i rritjes synon përfitimin nga tregu i lirë para anëtarësimit në BE.
“Plani i rritjes synon të na ofrojë për të përfituar nga tregu unik para anëtarësimit. Plani e rrit shpejtësinë e reformave dhe konvergjencës mes Kosovës dhe BE-së”, ka thënë Kurti.
Tutje ai ka deklaruar se plani i rritjes mund të shtojë 10 për qind vlerën e produktit bruto.
“Me nivelin aktual të rritjes ekonomike, produkti bruto qëndron ndërmjet 30 përqind dhe 50 përqind të mesatares së BE-së. Plani i rritjes së BE-së mund ta shtojë edhe 10 për qind”./teve1.info/
