Kryeministri në detyrë, Albin Kurti ka thënë se presidenti serb, Aleksander Vuçiq i ka dhënë në dispozicion të gjitha burimet dhe mjetet shtetërore Listës Serbe dhe kryeterroristin, Millan Radoiçiq për të sabotuar konsolidimin e institucioneve shtetërore.
Kurti në Facebook ka shkruar së në shënjestër janë disa deputetë të pakicave joserebe.
Ai ka thënë se institucionet e Kosovës kanë informacione të konfirmuara për këtë.
“Pas ndërhyrjes në zgjedhjet parlamentare të 9 shkurtit 2025 në Republikën e Kosovës, për çfarë kemi informuar në konferencë për media bashkë me ministrin Nenad Rashiq me datë 9 mars 2025, Serbia po vazhdon përpjekjet për sabotimin e konsolidimit të institucioneve të dala nga këto zgjedhje. Presidenti i Serbisë, Vuçiq, ua ka dhënë në dispozicion burimet dhe mjetet shtetërore për këtë Listës Serbe dhe kryeterroristit Millan Radoiçiq, i cili në agresionin kriminal e terrorist të Banjskës, më 24 shtator 2023, ishte nënkryetar “de jure” i Listës Serbe, kurse tani është kryetar “de facto” i këtij subjekti politik. Në shënjestër janë disa deputetë të pakicave joserbe. Institucionet e sigurisë kanë informacion të konfirmuar lidhur me këtë, dhe kjo ishte njëra ndër çështjet që shqyrtuam në mbledhjen e sotme të Këshillit të Sigurisë së Kosovës”, ka shkruar Kurti.
