Shumë shpejt këtij universiteti do t’ia mësyejnë edhe studentët e komunitetit romë.
Kjo meqë në Qendrën e Gjuhëve në Fakultetin Filologjik të Universitetit të Prishtinës “Hasan Prishtina” po planifikohet të hapet një kurs, ku për herë të parë do të mësohet gjuha bazike rome.
Lindita Rugova, dekane në Fakultetin e Filologjisë, përmes një përgjigjje me shkrim thotë se aktualisht gjithçka është në fazën e planifikimit.
“Ende nuk është hapur, vetëm kemi bërë planifikimin. Së pari duhet të i rregullojmë sallat, të gjejmë mësimdhënës. Por nëse arrijmë ta bëjmë gati, do të jemi të lumtur ta ofrojmë. Po punojmë në këtë aspekt, duhet të ua sigurojmë pagesën mësmdhënësit. Po presim që gjatë gushtit me u rregullu sallat e QGJ me infrastrukturë nga IOM dhe UP. Sapo të rregullohen gjatë gushtit, në shtator mblidhemi dhe ju informojmë për hapat e mëtejmë. Të gjitha çështjet janë në fazë të planifikimit ende”, deklaroi ajo.
Mirëpo një nismë e tillë është e mirëpritur nga organizata “Roma Versitas”, qëllim i së cilës është integrimi dhe përfshirja e komunitetit përmes arsimit.
Përfaqësuesi i kësaj organizate, Avni Mustafa thotë sfidë e madhe mund të jetë t’i bindin njerëzit që të ndjekin një kurs të tillë.
“Duke pasur parasysh se sa e vogël është Kosova, mendoj që do të jetë një sfidë e madhe t’i bindim njerëzit që të ndjekin një kurs të gjuhës rome. Për shkak se në Kosovë fliten katër dialekte. Kemi gjuhën rome që flitet në pjesën qendrore të Kosovës, e cila përfshin Plementinën e Llapllasellen. Pastaj kemi romët në Prizren të cilët flasin gjysmë turqisht e gjysmë rome. Kemi edhe romët nga Peja dhe Mitrovica, shumica e të cilëve e flasin dialektin” gurbetski”. Kështu që nuk jam i sigurt se cili dialekt do të përdoret në këtë kurs. Megjithatë besoj se cilido dialekt i zgjedhur do të sjell fakte konkrete tek pjesëmarrësit e kursit”, thotë Mustafa.
Ndërkaq edhe nga njohës të arsimit po vlerësohet e qëlluar.
Drejtori i institutit Ed Guard, Rinor Qehaja thotë se një iniciativë e tillë mund të shërbejë për të ndërtuar komunikimin ndëretnik.
“Ekspozimi i nxënësve të arsimit parauniversitar në gjuhë të ndryshmë të komuniteteve të ndryshme që jetojnë në Kosovë, prezanton një iniciativë të mirë që ngrit në integritet, nxit për ekspozim të të gjithë të rinjve në etni të ndryshme në kultura të ndryshme që kemi brenda Kosovës , kjo mund të shërbejë po ashtu edhe të shërbejë për të ndërtuar komunikimin e domosdoshëm ndëretnik që e kemi”, bëri të ditur Qehaja.
Mësimi i gjuhës rome është akredituar nga Ministria e Arsimit në Kosovë në vitin 2010, si mësim plotësues dhe zgjedhor për nxënësit e interesuar, vetëm në katër shkolla të Komunës së Prizrenit.
