Thirrjes së ezanit në orët e hershme të mëngjesit ju përgjigjen shumë besimtarë në Prishtinë. Krejt kjo për të marrë pjesë në faljen e Namazit të Kurban Bajramit.
Shumë nga ta, më vete nga shtëpitë morën edhe sixhadet për falje.
E ata që u zgjuan më herët, zunë vend brenda xhamisë.
Ndërsa ata që flenë më shumë të mërkurën, mbushen oborrin e xhamisë “Sulltan Mehmet Fatihut II”
Jashtë hapësirë të xhamisë, që gjithçka të shkonte mirë, po përkujdesej Policia e Kosovës.
Për shumë xhematlinjë, kjo nuk ishte hera e parë që po marrin pjesë në faljen e Bajramit.
“Vije për çdo Bajram mu fal, i uroj gjithë shqiptarëve kudo që janë festën e Kurban Bajramit”, tha Veli Gashi, qytetar i Prishtinës.
Këtu nuk munguan as ata të cilët i gëzohen më së shumti festës.
“Unë kom ardh me babin këtu dhe urime Bajramin të gjithëve”, Norik Kastrati, qytetar nga Prishtina
Më tu afruar koha e namazit, xhematlinjët morën edhe instruksionet e fundit.
E në orën 5:38, erdhi edhe koha e faljes.
Pas namazit, të pranishmëve iu drejtua Myftiu i Kosovës, Naim Tërnava.
“Dukuri tjetër që më së shumti kërcënon shoqërinë është dhuna brenda familjes. Ajo në të shumtën e rasteve mbahet e fshehtë dhe në shumë raste mbetet e padukshme, e strukur në harresë dhe si e tillë mbetet e padënueshme, ngase tek ne fatkeqësisht mbretëron mendësia se kjo është pjesë e jetës private”, tha Tërnava
Ai nuk la pa përmendur as gjendjen e krijuar së fundmi në Veriun e vendit.
Për këtë tha se dhuna nuk është zgjidhje.
“Tash e sa muaj në veri kemi tensionim të gjendjes. Qeveria dhe institucionet ndërkombëtare duhet të kontribuojnë edhe më shumë, në të gjitha mundësitë e tyre në shtensionim të situatës dhe uljen e tensioneve. Të gjitha problemet duhet të zgjidhen përmes dialogut, larg nga përdorimi i dhunës”, u shpreh myftiu.
Më përfundimin e ligjëratës, filluan edhe urimet.
Por, çfarë këshillojnë hoxhallarët për këtë ditë feste?
“Përveç ceremonisë së faljes së Kurban Bajramit, në këtë ditë ata që kanë mundësi e prejnë Kurbanin, i vizitojnë familjarët, dhe në këtë ditë është e preferuar që të përmendet shpesh madhërimi i Zotit”, tregon imami Bashkim Mehani.
Në manifestimin qendror të Kurban Bajramit të mërkurën, nuk u pa asnjë nga krerët e shtetit.
