Ka tre ditë që nuk kanë ujë.
E thuajse çdo njëri po detyrohet të blejë.
Kësisoj, banorët e lagjes “ Bregu i Diellit” në Prishtinë po furnizohen tash e ca ditë.
E të mllefosur janë edhe për faktin që nuk po njoftohen me kohë për problemet.
“Shumë, jo për pijë se për me pi e blejmë nuk është problem, por për gjërat elementare ditore. Unë për vete nuk jam tu e kuptuar se si në shekullin e XXI, që 24 orë ndërpritet uji dhe banorët nuk kanë asnjë njoftim. Sot kemi pasur që nga ora 07:00-09:00 e tash në momentin që po flasim nuk kemi ujë”, shprehte Nurije Ferati -qytetare.
Edhe Tahir Deramaku është i brengosur për këtë çështje duke potencuar se pa ujë vështirë të ia dalin.
“Po më thotë reja, ujë nuk kemi hiç e unë i thash se çka u bë kështu, e dje gjithë ditën nuk ka pas e për natën a ka ardh nuk e di. Tani sot prapë erdh një orë a dy edhe më prej atëherë nuk ka hiç ujë. Pa ujë nuk jetohet. Po blejmë ujë me bidon kështu çka me bo”, thotë ajo.
Telashet shtohen edhe më shumë për qytetarët pasi thonë që uji mungon në pikun e verës.
“Është shtirë sidomos për higjienën personale për shkak se për pije mundet me u bo zgjidhje, mirëpo është shumë e vështirë, është e papërballueshme. Ka tri deri në katër vite që ka probleme të tilla që ndalet sidomos gjatë verës do të thotë ka shumë pak furnizim të bollshëm edhe konstant”, shprehet një tjetër qytetar.
Ndërsa edhe nga Kompania Rajonale e Ujësjellësit “ Prishtina” e pranojnë se ka pasur destabilizim me ujë, por sipas tyre së shpejti pritet që të kthehet furnizimi i rregullt te qytetarët.
“Realisht kemi pasur një destabilizim të gjendjes së furnizimit me ujë të pijshëm në impiantin e trajtimit të ujit në Shkabaj. Impiant ky që e merr ujin nga kanali i Iber-Lepencit për të trajtuar dhe dërguar pastaj te konsumatorët. Mirëpo për shkak të disa punimeve teknike në kanalin e Iber- Lepencit që po behët për një riparim më të mirë uji është turbulluar dhe ka qenë e pamundur të trajtohet në këtë impiant. Ky impiant ka qenë jashtë funksionit, ndërkaq ditën e djeshme në orët e pasdite ka filluar të stabilizohet, mirëpo efekti po ndihet edhe ditën e sotme, në shumë zona të kryeqytetit sidomos në lagjen : “Arbëria”, “ Rruga C”, “Bregu i Diellit”, por po shpresojmë që shumë shpejtë do të stabilizohet dhe do të kthehet furnizimi i rregullt”, ka thënë Mjeku.
Nga ky destabilizim kanë pësuar edhe banorët e Fushë Kosovës dhe Drenasit ditë më parë, por atyre i është kthyer furnizimi gjatë së dielës.
