Po e patrullojnë secilin cep të territorit të Kosovës.
Njësoj, si këtu në pjesën veriore, trupat e aleancës veri atlantike të NATO-s do të vazhdojnë angazhimin e tyre në Kosovë për garantimin e sigurisë.
Vet NATO-ja, aleanca ushtarake më e fortë në botë, në një përgjigje për Tëvë1 ka demantuar raportimet e mediumit gjerman “Bild” se po përgatitet tërheqja e trupave amerikane në kuadër të KFOR-it nga Kosova.
“Si pjesë e kësaj, ShBA-ja e ka bërë të qartë gjithashtu pritjen e saj që aleatët e NATO-s të bëjnë më shumë, të investojnë më shumë dhe të prodhojnë më shumë në mbështetje të sigurisë sonë të përbashkët. NATO po përshtatet vazhdimisht me një mjedis në ndryshim. Kjo është pjesë e asaj që duhet për të qëndruar gati”, thuhet nga NATO
Më tutje, në përgjigje u tha se angazhimi i NATO-s për stabilitet në të gjithë Ballkanin Perëndimor është i palëkundur.
“KFOR-i vazhdon të zbatojë mandatin e tij, bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme, dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë, në rolet e tyre përkatëse si reagues të sigurisë”, thuhet tutje.
E koloneli në pension i FSK-së vlerëson se veprime të tilla tentojnë të përhapin konfuzitet për shkak të zhvillimeve në Evropë pas bisedimeve mes dy fuqive botërore, SHBA-RUSI.
“Disa shtete në lindje të Evropës ishin pjesë e Bashkimit Sovjetik, dhe fjala ishte për këto pjesë që të tërhiqet NATO nga këto shtete dhe jo edhe nga Ballkani ku situata është krejt më ndryshe sesa ajo që është në lindje për shkak se edhe interesat ruse në atë pjesë janë krejt më ndryshe sesa në Ballkan, ndonëse edhe Ballkani është edhe një pikësynim i tyre”, thotë Hysen Gecaj- kolonel në pension i FSK-së.
Kurse ish-oficeri i forcave ajrore, Ismet Ibishi tregon se kur mund të ketë tërheqje të trupave të NATO-s.
“Në një periudhë jo të lartë edhe ushtria jonë do të jetë pjesë e ombrellës së NATO-s. Atëherë mund të llogartiet në tërheqjen e pjesshme të forcave të NATO-s duke u kompensuar me forca vendore, por kjo me siguri do edhe një kohë derisa të përfundojnë të gjitha ato trajnime aftësime të kuadrit tonë vendor gjegjësisht Forcës së Sigurisë së Kosovës”, ka thënë Ibishi.
Nga NATO u tha po ashtu se vazhdojnë të japin kontributit brenda KFOR-it me rreth 600 trupa në Kosovë.
