Pas Finlandës, shteti që së shpejti mund të jetë anëtar i NATO-s, është Suedia.
Kjo pas mbështetjes që të hënën i dha Turqia, e cila deri më tash refuzonte ta ratifkonte në Kuvend, marrëveshjen për anëtarësimin e shtetit skandinav në aleancën veri-atlantike.
Meqenëse edhe Kosova synon të jetë pjesë e organizatës më të madhe ushtarake, njohës të fushës konsiderojnë se ka çështje pezull që duhen plotësuar.
Njohësi i proceseve të sigurisë, Bedri Elezi thotë se duke u nisur nga gjendja aktuale e sigurisë, vendi duhet të përshpejtojë procedurat.
“Kosova aktualisht nuk është afër realizimit të kërkesave të saj që kishte në strukturimin në NATO. Duke filluar nga plotësimi i të gjitha dokumentacioneve për anëtarësim në NATO, pastaj zbatimi I kritereve, platformave dhe programeve që NATO ka për shtetet pretenduese që duan të jenë anëtarë dhe padyshim një fushatë në shtetet të cilat janë me ndikim dhe kanë fuqi për të mbështetur edhe anëtarësimin e Kosovës”, vlerësoi Elezi.
Në anën tjetër, profesori i shkencave të sigurisë, Avni Islami thotë se pa një marrëveshje finale në dialog mes Kosovës dhe Serbisë, anëtarësimi në NATO është thuajse i pamundur.
“Për antërësimin e një vendi që synon të jetë pjesë e aleancës veriatlantike, duhet që unanimisht të gjitha shtetet të jenë nënshkruese për anëtarësim të atij shteti. Dihet që sot e kësaj dite, pesë shtete nuk e njohin Kosovën dhe unë besoj që me arritjen e një marrëveshje mes Kosovës dhe Serbisë, atëherë edhe Kosova do të jetë kandidat potencial që të jetë pjesë e Aleancës Atlantike”, u shpreh Islami.
Që një shtet të bëhet anëtar i NATO-s, duhet që të gjitha shtetet anëtare të ratifikojnë në parlamentet e tyre protokollet e pranimit për vendet kandidate.
