Presidenti turk, Recep Tayyip Erdogan, këtë të premte nis vizitën shtetërore në Gjermani.
Erdogan do të takohet me presidentin gjerman, Frank Walter-Steinmeire dhe kancelarin, Olaf Scholz.
Të dy takimet do të jenë me dyer të mbyllura për t’i lënë vend një darke private, shkruan BBC.
Marrëdhëniet midis presidentit Erdogan dhe qeverive të njëpasnjëshme gjermane kanë qenë të vështira për vite me radhë, me mospajtimet e vazhdueshme midis Berlinit dhe Ankarasë.
Kur zyrtarët qeveritarë nga Gjermania përmendin shprehjen “partner i vështirë”, dihet se po flasin për Erdoganin.
Vizita vjen në kohën kur dallimet në qëndrimet e të dy shteteve sa i përket konfliktit Izrael-Hamas po rriten.
Gjatë muajit të kaluar presidenti turk është bërë gjithnjë e më i ashpër në kritikat e tij ndaj Izraelit teksa ka refuzuar të dënojë vrasjet dhe pengmarrjet nga Hamasi, duke iu referuar grupit si “çlirimtarë”.
Teksa Hamasi është klasifikuar si një organizatë terroriste nga aleatët perëndimorë, përfshirë këtu edhe Gjermaninë.
Edrogani gjithashtu ka vënë në pikëpyetje ekzistencën e shtetit hebre duke thënë se “fashizmi i vetë Izraelit” minoi legjitimitetin e tij.
Udhëheqësit hebrenj në Gjermani e kanë akuzuar Erdoganin se ka nxitur antisemitizmin me komente të tilla dhe ka pasur thirrje që qeveria gjermane të anulojë vizitën e presidentit turk.
Siç shkruan BBC ekziston frika se çdo koment për konfliktin nga Erdogani gjatë vizitës së tij mund të ndezë tensionet.
