Kupchan në një intervistë për Radio Evropën e Lirë, shton se mbetet të shihet se kur do të arrihet kjo gjë, porse ai është i bindur se Serbia do ta bëjë.
“Serbia do ta njohë përfundimisht pavarësinë dhe sovranitetin e Kosovës dhe një nga elementet kyçe të kësaj përpjekjeje, do të jetë integrimi i saj në Bashkim Evropian. Megjithatë, mbetet të shihet se si dhe kur do të arrihet ky qëllim. Unë besoj se njohja formale duhet të jetë parakusht. Kjo është leva që ka Bashkimi Evropian në marrëdhëniet me Serbinë: anëtarësimi i plotë në këmbim të njohjes së Kosovës”, ka thënë Kupchan.
Ai ka thënë se kjo do të jetë nxitje e mjaftueshme për Serbinë që t’i normalizojë marrëdhëniet me Kosovën.
“Aktualisht, këto procese janë në regres dhe lufta në Ukrainë është duke tërhequr vëmendjen më të madhe. Fluksi masiv i refugjatëve ukrainas mund ta ngadalësojë integrimin evropian. Megjithatë, e konsideroj si një pauzë të përkohshme. Duhet pasur parasysh se përveç luftës në Ukrainë, bota po kalon edhe një pandemi me të gjitha pasojat e saja, përfshirë edhe ekonomike. Kjo mund të marrë kohë, por nuk do të bëhet një rregull i përhershëm i funksionimit”, tha Kupchan.
Ai ka thënë se letra që kancelari gjerman Olaf Scholz dhe presidenti i Francës, Emmanuel Macron, ia kanë dërguar kryeministrit të Kosovës, Albin Kurti dhe presidentit të Serbisë, Aleksandar Vuçiq, vjen në kohën e duhur.
“Kjo letër bart mesazhin e duhur. Rritja e tensioneve midis Serbisë dhe Kosovës – dhe në të gjithë rajonin në përgjithësi – kërkon një angazhim më të madh, evropian dhe transatlantik. Edhe Macron, edhe Scholz kanë vërtetë të drejtë kur thonë se ajo që nevojitet, është normalizimi i plotë i marrëdhënieve ndërmjet Kosovës dhe Serbisë. Beogradi e Prishtina duhet të marrin vendime të vështira dhe t’i arrijnë kompromiset e nevojshme për këtë qëllim”, tha Kupchan.
