Pas dhënies së urdhërit për vendosjen e tarifave ndaj vendeve fqinje, Kanadasë dhe Meksikës, presidenti amerikan ka kërcënuar me tarifa të reja edhe vendet europiane.
Kryeministri I Kanadasë nuk ka vonuar shumë dhe i është kundërpërgjigjur Trumpit duke vendosur tarifa “të gjera” prej 25%, që prekin vlerën e 155 miliardë dollarëve kanadezë (106.6 miliardë dollarë) të mallrave amerikane, duke filluar nga birra dhe vera, tek pajisjet shtëpiake dhe mallrat sportive, veprim ky që shënon fillimin e një lufte tregtare midis vendeve fqinje.
Tani, udhëheqësi i Ontarios – provinca më e populluar e Kanadasë, e cila përbën rreth 38% të GDP-së së vendit – ka përcaktuar gjithashtu disa pasoja të veprimeve të Trump për kompanitë amerikane që operojnë në provincë.
Ai shton se Ontario do të “shkojë një hap më tej” duke “shkëputur” kontratën e provincës me kompaninë satelitore të Elon Musk Starlink, një firmë që ofron internet të shpejtë në mbarë botën, raporton AP.
Në takimin e liderëve europianë që u mbajt në Bruksel, është diskutuar mbi pasojat e mundshme ekonomike në rast të vendosjes së këtyre tarifave nga ShBA-ja.
Udhëheqësi gjerman Olaf Scholz thotë se BE-ja mund të përgjigjet me tarifat e veta, por është më mirë që të dyja palët të arrijnë një marrëveshje tregtare.
Kurse guvernatori i bankës qendrore franceze, Francois Villeroy de Galhau i quan tarifat “brutale” dhe thotë se ato “do të rrisin pasigurinë ekonomike”.
Ndaj deklaratave të Trump ka reaguar edhe shefja e politikës së jashtme të BE-së, Kaja Kallas e cila u tha gazetarëve se “nuk ka fitues në luftërat tregtare”.
Edhe presidentja meksikane, Claudia Sheinbaum, ka thënë se do ndërmarr masa hakmarrëse ndaj tarifve të vendosura ndaj vendit të saj, megjithëse edhe nuk ka ndërmarrë ndonjë veprim konkret.
Kurse, rivali ekonomik e ushtarak I ShBA, Kina, të cilës Trump poashtu i vendosi një tarifë prej 10%, ka thënë se do ngrej padi në Organizatën Botërore të Tregtisë dhe do shqyrtoj masat e mëtejshme që do të ndërmarrë si kundërpërgjigjje.
Taksa e importit prej 25% për mallrat nga Kanadaja dhe Meksika dhe 10% për mallrat nga Kina hyn në fuqi të martën në mëngjes.
