Marash Kumbulla po zhvillon një sezon fantastik tek Espanyoli në Spanjë. Mbrojtësi, i cili është në huazim te klubi spanjoll nga Roma, ka bindur me paraqitjet e tij.
Mësohet se në përfundim të kampionatit, drejtuesit e Espanyolit do të ulen në tavolinë me ata të Romës për të biseduar për shifrën e një transferimi të mbrojtësit, që prej disa vitesh është pjesë e Kombëtares.
Roma është e kompletuar në mbrojtje dhe Kumbulla do të ishte i tepërt për sezonin e ri, kështu që mundësia e madhe është që klubi italian ta shesë përfundimisht tek Espanyoli, për të rikuperuar disa të ardhura.
Këta të fundit e shohin Kumbullën si pjesë të projektit edhe për sezonin e ri, megjithatë shifra që do të shtrohet në tavolinë, do të jetë thelbi i diskutimit dhe asaj që do të vendoset.
Kumbulla në Barcelonë i ka surprizuar të gjithë. Atij iu besua një fanellë titullari dhe ka luajtur në 30 ndeshje deri tani, nga ku 29 janë nga fillimi.
Për më tepër, forma e tij erdhi në rritje, ai jep garanci në prapavijë dhe madje ka shënuar edhe tre gola në La Liga, kundër Mallorcës, Sevillës dhe Getafes. Me hapjen e merkatos, do të vendoset e ardhmja e Kumbullës, që me shumë mundësi do të jetë sërish në Spanjë.
