Kombëtarja e Shqipërisë në futboll po i vazhdon përgatitjet me intensitet të plotë para ndeshjeve me Çekinë dhe Gjeorgjinë në kuadër të Ligës së Kombeve.
Selektorit Sylvinho në grumbullim tashmë i janë bashkuar të gjithë lojtarët, ndërsa të mërkurën në konferencën për shtyp, u paraqitën mbrojtësit Mario Mitaj e Marash Kumbulla.
Mitaj u fokusua te përballja me Çekinë, të cilën Shqipëria e luan të shtunën në udhëtim, ndërsa e vlerësoi si kundërshtar tejet të vështirë.
Ai shtoi se e njohin Çekinë me të cilën janë përballur dy herë vitin e kaluar dhe insistoi se Shqipëria ka ekip më të fortë.
Edhe Kumbulla vlerësoi lartë Çekinë e Gjeorgjinë, duke shtuar se janë kundërshtarë shumë të vështirë por insistoi se Shqipëria do të futet në fushë për të fituar.
Kumbulla shtoi se Shqipëria është e motivuar maksimalisht si për duelin me Çekinë ashtu edhe për atë kundër Gjeorgjisë.
Megjithatë, ai shtoi se Shqipëria mendjen e ka te dueli me Çekinë, ku synon pikët e plota përpara se të fokusohet tek fitorja ndaj Gjeorgjisë.
Shqipëria, të shtunën përballet me Çekinë kurse tri ditë më vonë luan me Gjeorgjinë në kuadër të Ligës B të Ligës së Kombeve.
Të dyja këto ndeshje, Shqipëria që i ka tri pikë në grup, i luan në udhëtim.
