Presidenti amerikan, Donald Trump, ka propozuar zhvendosjen e palestinezëve nga Gaza në vendet fqinje si Egjipti dhe Jordania.
Mirëpo, një propozim i tillë u kundërshtua nga ish-administrata e Joe Biden.
Ndërkaq, këtë propozim e ka komentuar edhe eksperti i politikave të sigurisë dhe Gjeopolitikës, Ilir Kulla në emisionin e “MATRIX” në Tëvë1.
Kulla thotë se presidenti Trump nuk mund të marrë asnjë lloj vendimi për Gazën pa marrë pëlqimin e vendeve arabe.
“Do t’i duhet ShBA-së dhe presidentit Trump të gjej një ekuilibër mes nevojave të të gjitha palëve. Pse e thashë këtë gjë? Sigurisht sot mund të ketë disa ide për Gazën, por asnjë vendim as i Izraelit as i ShBA-së nuk do të kalohet pa pasur “OK” nga vendet arabe. Tashmë ka ardhur përgjigja nga Egjipti dhe Jordania të cilat janë kundër, por ajo që udhët ta shikojmë, është Arabia Saudite e Katari”, ka thënë eksperti i politikave të sigurisë dhe Gjeopolitikës, Ilir Kulla.
Ndërkohë, administrata Biden kundërshtoi zhvendosjen e banorëve të Gazës jashtë enklavës, duke mbrojtur një kthim të banorëve të Gazës në shtëpitë e tyre pas një paqeje të mundshme dhe një zgjidhje me dy shtete.
Që nga 19 janari, është vendosur një armëpushim për t’u sjellë pushim civilëve në enklavën palestineze, por Trump tha javën e kaluar se nuk ka besim se armëpushimi do të mbahet./teve1.info/
