Eksperti i Politikave të Sigurisë dhe Gjeopolitikës, Ilir Kulla, ka thënë trupat amerikane nuk do të largohen nga Kosova.
Ai ka thënë se është normale të pritet që të ketë një reduktim të ushtarëve amerikanë në kuadër të KFOR-it, por që baza e saj në Kosovë, Kampi Bondsteel nuk do të largohet.
“Jo të gjitha trupat amerikane që janë në Kosovë, janë në kuadër të KFOR-it. Është normale që pas 26 vjetëve të ketë një reflektim të amerikanëve në një vend të stabilizuar ku fuqitë e tjera të aleancës janë prezente, kanë trupa, monitorojnë komandojnë, të kërkojnë një reduktim brenda KFOR-it. Është pjesa tjetër e bazës së Bondsteel, nuk do të ketë largim të Kampit Bondsteel e cila nuk është bazë e KFOR-it, është bazë amerikane”, ka thënë Kulla në emisionin “MATRIX” në Tëvë1.
Raportimi i mediumit gjerman javë më parë për largim të trupave amerikane nga Evropa, përfshirë edhe Kosovën ka ngjallur reagime të mëdha.
Por, një gjë e tillë është mohuar edhe nga institucionet e Kosovës.
Edhe nga NATO kanë thënë se janë në bashkëpunim dhe koordinim me ShBA-në për të ofruar siguri dhe stabilitet në Ballkanin Perëndimor.