Eksperti i Politikave të Sigurisë dhe Gjeopolitikës, Ilir Kulla ka thënë se mbledhja e Asamblesë së Organizatës së Kombeve të Bashkuara e mbajtur javë më parë në 80 vjetorin e themelimit të organizatës, shpërfaqi dobësitë e saj.
Ai ka thënë nga kjo mbledhje u pa se organizata ka probleme edhe në pikëpamjen e vendimmarrjes
“U demonstrua dobësia e organizatës. Organizata nuk është e dobët vetëm politikisht, por edhe nga pikëpamja e vendimmarrjes. Bëhen shumë rezoluta të cilat nuk zbatohen. Duket se ka probleme të rënda ekonomike, pasi anëtarët po reduktojnë gjithnjë e më shumë paratë që japin për organizatën”, ka thënë Kulla në emisionin “Matrix” në Tëvë1.
Ai tha se gjatë mbledhjes doli në pah se bota është në një moment të brishtë ku janë 52 konflikte e 2 nga to janë afër me rajonin.
“U evidentua që jemi në një moment shumë të brishtë, që ekzistojnë 52 konflikte në botë ku dy nga to janë relativisht afër me ne, Lindja e Mesme dhe Ukraina. U evidentua që ka nevojë për një reformë të thellë të Këshillit të Sigurimit të OKB-së. Pati përplasje në sallë, fjalime. Një nga fjalimet me impresionuese ka qenë ajo e presidentes së Sllovenisë dhe presidentit të Turqisë”, është shprehur ai.
