Eksperti i sigurisë dhe marrëdhënieve ndërkombëtare, Ilir Kulla duke folur situatën e shqiptarëve në Çamëri, ka thënë se kjo duhet të jetë prioritet i Shqipërisë.
Por, ai ka thënë se Kosova ka vepruar drejt që nuk është përfshirë në këtë çështje.
Kjo pasi sipas tij, Kosovës i duhet njohja nga Greqia dhe është duke vepruar mirë që mban raporte me shtetin grek.
“Kosova duke qenë një shtet që ka nevojë për njohjen nga ana e shtetit grek për të kompletuar atë pesë vendet e tjera të BE-së dhe NATO-s, mirë e bën që përpiqet të mbajë marrëdhënie të mira me Greqinë. Unë mendoj që çështja çame duhet të jetë prioritare i ministrisë së Jashtme dhe të Brendshme të Shqipërisë si një çështje evropiane e të drejtave të njeriut dhe të drejtave kombëtare. Mospërfshirja e Kosovës në një konflikt të tillë politik është një gjë inteligjencë sepse e ruan Kosovën nga hallet e tjera”, ka thënë ai në emisionin “Matrix” në Tëvë1.
Ai ka thënë se njohja e Kosovës nga Greqia dhe Qipro mund të ndodhë në një të ardhme të afërt.
“Fakti që Greqia i lejon qytetarët e Kosovës të udhëtojnë me pasaporta të Kosovës në Greqi është një ogur i mirë që edhe Greqia dhe Qipro në një të ardhme të afërt ta njohin Kosovën”, ka thënë ai.
Greqia dhe Qipro janë dy nga pesë vendet e përhershme të BE-së që nuk e kanë njohur pavarësinë e Kosovës.
