Përndjekje politike janë cilësuar nga Partia Socialdemokrate operacionet e sotme policore tek ish-zyrtarët e Ndërmarrjes Publike Banesore (NPB).
Sipas kryetarit të PSD-së, Daradan Molliqaj, kjo është krejtësisht e qartë, përcjell teve1.info
“Jo rastësisht qytetarët na thonë ju jeni opozita e vetme, ata nuk kishin problem me hajni por me ata që bëjnë opozitë”, ka deklaruar ai në një konferencë për media.
Teksa ish-aksionari i NPB-së, njëherit anëtar i PSD-së, Dren Kukaj deklaroi se bastisjet janë përndjekje politike që po i bëhet atij dhe PSD-së. Ai ka kritikuar edhe reagimin e ministrit të Brendshëm Xhelal Sveçla.
“Ministri i Punëve te Brendshme pa përfunduar aksioni thotë ka qenë aksion i suksesshëm. Çka ka të suksesshme këtu?! Jam i bindur në ligjshmërinë e veprimeve. Jemi bërë cak i përndjekjeve politike”, tha ai.
Kukaj po ashtu bëri të ditur se i është bastisur banesa e tij dhe shtëpia e prindërve.
“Sot më janë bastisur fillimisht shtëpia e prindërve, pastaj në banesë, kanë hyrë në banesë dhe e kanë bastisur tërë banesën. Kanë marrë 2 kompjuterë të prindërve dhe një telefon personal, pastaj e kanë bastisë banesën ku jetoj me grua dhe fëmijë, ma morën veç telefonin”, shtoi ai.
