Loriana Kuka ka mbyllur paraqitjen e saj në Lojërat OIimpike “Parisi 2024”.
Kuka, të martën, u eliminua në rrethin e dytë të kategorisë deri 78 kilogramë.
Në këtë raund, Kuka u mposht nga xhudistja ukrainase Yelyzaveta Lytvynenko për t’i dhënë fund shpresave për të arritur diçka më shumë në Olimpiadë.
Në fakt, Kuka e nisi mirë garimin pasi në xhiron e parë triumfoi me Ippon ndaj sllovenes Meta Lobnik.
Me eliminimin e Kukës, kanë marrë fund edhe garat për xhudistët e Kosovës në Olimpiadën e Parisit.
Kuka ishte garuesja e fundit në tatami, ndërsa xhudoja në këtë ngjarje u përfaqësuar me pesë garues që ishin kualifikuar me normë olimpike.
Para Kukës, në Paris garuan edhe Distria Krasniqi (52 kg), Nora Gjakova (57’), Akil Gjakova (73 kg) e Laura Fazliu (63 kg).
Distria Krasniqi e Laura Fazliu siguruan medalje për Kosovën, duke e fituar të argjendtën përkatësisht të bronztën.
Nora Gjakova u eliminua në xhiron e parë, ndërsa Akil Gjakova doli i pesti në kategorinë e tij.
