Shërbimi Korrektues i Kosovës vazhdon të zbatojë praktika që kontribuojnë në risocializimin e personave të privuar nga liria, duke e dëshmuar këtë edhe përmes aktiviteteve që promovojnë përfshirjen, përgjegjësinë dhe zhvillimin personal.
Një shembull i tillë është edhe mirëmbajtja e kopshtit në ambientet e jashtme të Qendrës së Paraburgimit në Prishtinë.
“Të dënuarit që janë pjesë e programeve të punës brenda institucionit kontribuojnë drejtpërdrejt në mirëmbajtjen dhe gjelbërimin e hapësirave, duke krijuar një ambient të rregulluar, të pastër dhe estetik. Kopshti, i mbjellë me lule dekorative dhe bimësi të ndryshme, është rezultat i përkushtimit të tyre dhe një shembull konkret i përfitimeve që sjell angazhimi aktiv në aktivitete të dobishme”, thuhet nga Shërbimi Korrektues i Kosovës.
Përmes këtyre veprimtarive, të dënuarit jo vetëm që ndihmojnë në përmirësimin e kushteve të jetesës brenda institucionit, por gjithashtu zhvillojnë aftësi praktike, ndjenjën e punës së ndershme dhe përgjegjësisë kolektive. Ky është një hap i rëndësishëm në funksion të përgatitjes për rikthimin e tyre në shoqëri si qytetarë aktivë dhe të përgjegjshëm.
