Në Fakultetin Filologjik u mblodhën të enjten.
Studentë e profesorë pritën në sallën ‘’Idriz Ajeti’’ dy profesorët nga Italia.
Roberto Tottoli edhe Francesca Bellino, të dy të dëshmuar në studimet orientale, përfaqësuan Universitetin e Napolit ‘’Lorientale’’ në Prishtinë.
“Prania e tyre sot, në mesin tonë është dëshmi që ata janë të interesuar të thellojnë bashkëpunimin me Universitetin e Prishtinës, saktësisht me Fakultetin e Filologjisë”, u shpreh Abdullah Rexhepi, dekan i Fakultetit Filologjik.
E një pasqyrë të punës së profesorëve italianë e dha profesori Rexhep Ismajli.
Duke qenë studiues i Islamit dhe Kuranit, Roberto Tottoli dha një këndvështrim për keqkuptimet e këtyre temave në Evropë.
Megjithatë sipas tij, gjendja ka ndryshuar vitet e fundit.
Tottoli para të pranishmëve ligjëroi për ndikimin e veprës së Pjetër Bogdanit dhe studimin e islamit në kontekstin evropian.
Ndërsa një analizë të aktiviteteve enciklopedike arabe gjatë Periudhës Osmane e bëri profesoresha Francesca Bellino.
Ligjërata u organizua në kuadër të marrëveshjes që Universiteti i Prishtinës e ka me Universitetin e Napolit “L’Orientale”.
