Duke komentuar vendimin e Gjykatës Kushtetuese për tokat rreth Manastirit të Deçanit, Kryeziu thekson se këtë vendim duhet ta zbatojë Ministria e Ambientit së bashku me Drejtorinë e Kadastrit të Komunës së Deçanit.
Ai në emisionin”Këndi i Debatit” në Tëvë1 deklaroi se ky vendim duhet të zbatohet do apo nuk do Komuna e Deçanit. Ai tha se “shteti është ma i madh sesa Deçani”.
“Barra e kryetarit nuk është kjo. Ky është subjekt se komuna është person juridik, ky e përfaqëson atë por janë mekanizmat tjerë që duhet të zbatohen. Ky është titullar por mekanizmat tjerë janë mekanizma në kuadër të komunës dhe në kuadër të Ministrisë së Ambientit. Aty janë ato departamentet apo siç i quani, drejtoria për Pronë Kadastër në nivel të ministrisë, ata duhet ta marrin dhe ta zbatojnë nëse do, por janë të detyrueshëm ta zbatojnë, domethënë është i detyruar. A është vendim i mirë? Për mua nuk është i mirë? A duhet të zbatohet? Patjetër. Pse? Se shteti është ma i madh se Deçani ”, tha ai.
Tutje Kryeziu tha se “Vendimet e gjykatave duhet të zbatohen. Ky rast është rast i karakterit religjioz, karakterit social, karakterit kombëtar dhe karakterit ndërkombëtar”.
Në vitin 2016 Gjykata Kushtetuese ka vendosur që 24 hektarë tokë që në vitin 1946 i janë marrë Manastirit të Deçanit dhe më pas i janë kthyer më 1997 nga Serbia, t’i kthehen edhe nga institucionet e Kosovës. 6 vite pas vendimit të Kushtetueses po bëhet presion për zbatimin e tij. Ditë më parë edhe ambasadorët e vendeve të QUINT-it vizituan Manastirin e Deçanit dhe kërkuan që vendimi të zbatohet. /teve1.info/