Ish-nënkryetari i Gjykatës Kushtetuese të Kosovës, Kadri Kryeziu, ka komentur vendimin e fundit të Gjykatës Kushtetuese lidhur me bllokadën institucionale në Kuvend, duke e quajtur atë një “rishkrim të Kushtetutës” dhe një vendim që, në vend se të sjellë qartësi, prodhon më shumë paqartësi.
Në një shkrim të gjatë në Facebook, Kryeziu tha se e ka lexuar me vëmendje njoftimin për vendimin në rastet KO193/25 dhe KO196/25, duke shtuar se aktgjykimi i plotë ende nuk është publikuar, por edhe nga përmbledhja e dhënë nga Gjykata, ai shpreh shqetësime të thella.
“Prisja qartësi dhe rrugëdalje nga bllokada. Fatkeqësisht, ky vendim nuk e ofron këtë,” deklaroi ai.
Kryeziu e vlerëson si të pabazuar juridikisht vendimin e Gjykatës për të kufizuar nominimin e një kandidati për kryetar të Kuvendit në vetëm tre herë, duke e quajtur këtë veprim si ndërhyrje që nuk buron nga Kushtetuta. /teve1.info/
