Organizatat e shoqërisë civile kanë protestuar edhe sot para fillimit të seancës konstituive. “Kur t’ju bohet BOLL- Kallëzoni”, “Konkurs për deputetë të ri”, dhe “Krizën çojeni në shtëpitë tuaja”, kanë qenë disa nga mbishkrimet në protestën e organizatave të shoqërisë civile.
Drejtori i Institutit Demokratik të Kosovës (KDI), Ismet Kryeziu tha se shoqëria civile ka ofruar një platformë për dialog për zhbllokim të situatës, për çka theksoi se ende nuk ka marrë konfirmim nga kryetari i Lëvizjes Vetëvendosje, Albin Kurti, raporton KosovaPress.
“Ne kemi ofruar një mundësi tonë për një diskutim, ne e çmojmë rolin e presidentes dhe aktivitetet e saj për të pasur një dialog mes liderëve. Normalisht që roli i shoqërisë civile është shumë i kufizuar në këtë proces, por gjithsesi ne kemi ofruar vetën. Nga katër liderë kemi marrë konfirmim për pjesëmarrje dhe për gatishmëri të tyre për tu ulur në një tryezë të përbashkët ku mund të diskutohet për zhvillimet politike dhe daljen nga kjo situatë. Gjatë kësaj kohe ne ende nuk kemi marrë një përgjigje nga zotëri Kurti dhe nuk mund ta quajmë si refuzim, madje shfrytëzojë rastin t’i bëjë thirrje edhe nga tani edhe pavarësisht që kemi pasur takime direkte me të, por ende nuk kemi konfirmim që është i gatshëm të ulet në një tryezë, ndoshta arsyeshmëritë e tij kanë qenë nga fakti që edhe presidenca ka zhvilluar disa takime me liderë të partive politike por ne besojmë se vetëm kompromisi, konsensusi dhe dialogu mes liderëve dhe subjekteve politike do t’i shërbente kësaj situate”, u shpreh ai.
Protesta e organizatave të shoqërisë civile është mbajtur para fillimit të seancës, ku për herë të 45-të dështoi konstituimi i legjislaturës së nëntë të kuvendit.
Kosova ka mbajtur zgjedhjet parlamentare më 9 shkurt por ende nuk është bërë formimi i institucioneve të reja.
Procesi ka ngecur të zgjedhja e kryetarit të Kuvendit për çka Lëvizja Vetëvendosje, në koalicion me Guxo dhe Alternativa, nuk po arrin t’i sigurojë 61 votat e nevojshme për ta zgjedhur Albulena Haxhiun.
Ata po kërkojnë votim të fshehtë, por kjo, dhe kandidatura e Haxhiut, po kundërshtohen nga partitë e tjera parlamentare.
