Përparim Kryeziu, këshilltar i Kryeministrit të Kosovës, Albin Kurti, e ka demantuar vërtetësinë e një versioni të Asociacionit të publikuar në mediet e Kosovës një ditë më parë, raporton teve1.info
Përmes një statusi në Facebook, Kryeziu ka shkruar se ai dokument nuk përkon me propozimin Evropiano-Amerikan që i është dorëzuar kryeministrit Kurti në takimin e 21 tetorit si plan për ecjen përpara.
“Dokumenti që është publikuar dhe që ka qarkulluar mbrëmë në disa portale dhe televizione si “draft-statut i Asociacionit të Komunave me Shumicë Serbe” absolutisht nuk përkon me propozimin Evropiano-Amerikan që i është dorëzuar kryeministrit Kurti në takimin e 21 tetorit si plan për ecjen përpara.
Falënderojmë ato medie të cilat para publikimit apo shpërndarjes së këtij lajmi kanë kontaktuar Zyren e Kryeministrit për konfirmim dhe verifikim të raportimit, duke shmangur kështu keqinformimin e mëtejmë të publikut”, ka shkruar Kryeziu në Facebook.