Prokuroria Themelore në Prizren, përkatësisht Kryeprokurori Petrit Kryeziu, ka mbajtur sot një konferencë për media lidhur me dyshimet për manipulim të votave të kandidatëve në zgjedhjet e 28 dhjetorit.
Kryeziu tha se bëhet fjalë për mijëra vota të falsifikuara, dhe se vetëm një vendvotim në Prizren ka rezultuar i pastër. Ai theksoi se diferenca totale e keqpërdorimeve arrin 68 mijë e 17 vota.
“Sot secili prej atyre që ka guxuar t’i fusë duart në vullnetin e qytetarëve është ballafaquar me forcën e ligjit. Këtu bëhet fjalë për manipulime brenda llojit, aty ku katër subjektet kryesore politike i kanë dërguar të preferuarit e tyre dhe kanë menduar se mund të manipulojnë. Këtu nuk bëhet fjalë për dhjetëra e qindra, por mijëra vota të manipuluara e falsifikuara. Ka kandidatë që kanë deri mbi 6 mijë vota të falsifikuara. Vetëm në një vendvotim janë manipuluar 244 vota, përderisa në regjionin tonë mund të them se është vetëm një vendvotim që ka dalë i pastër. Diferenca totale e keqpërdorimeve është 68 mijë e 17 vota. Po flasim për një organizim për ta përmbyllur rezultatin dhe vullnetin e qytetarëve. Do të ishte e pamundur të ndryshoheshin këto vota po të mos kishte vullnet të të gjithë komisionerëve të deleguar nga partitë,” tha Kryeziu.
Ai shtoi se për këtë manipulim kanë pasur dakordim të komisionerëve të të gjitha katër partive kryesore, duke e bërë të pamundur një ndërhyrje masive pa përfshirjen e tyre.
