Kryetarja e Federatës Sindikale të Shëndetësisë, Tevide Imeri, ka thënë se personalisht është shumë e zhgënjyer që vlera e koeficientit të zyrtarëve publik është caktuar të jetë 105 euro.
Në një përgjigje për teve1.info ajo ka thënë se nesër prej orës 10:00 ka mbledhje Këshilli Drejtues dhe prej atje do të dalin me një vendim, se a do ta përkrahin apo jo këtë vendim.
“Unë jam personalisht goxha e zhgënjyer. Nesër e kemi thirr këshillin drejtues. Aty do të flasim, do ta analizojmë ligjin dhe do të dalim me një komunikatë për media”, ka thënë Imeri.
Tutje ajo ka shtuar se premtimet e disa prej eksponentëve qeveritarë, ishin për një vlerë mbi 120 euro.
“Pritjet kjanë qenë mbi 120. Kështu të paktën kanë qenë edhe fjalët e disa prej anëtarëve të kabinetit qeveritar”, ka shtuar ajo.
Imeri ka thënë se pagat janë sidomos të pavaforshme për një kategori të infermierëve dhe administratës në sistemin shëndetësor.
“Pagat janë të pavaforshme sidomos për infermierë e një pjesë të administratës. Por të shohim nesër se çfarë vendimi do të marrim”, ka përfunduar ajo.
Vlera e koeficientit të pagës për 82 mijë zyrtarë publik për vitin 2023 do të jetë 105 euro. Këtë vendim e ka marrë Qeveria në mbledhjen e sotme përderisa është miratuar edhe plotësim-ndryshimi i Buxhetit për vitin 2023.
Por cilat do të jenë pagat në sektorin e shëndetësisë me ligjin e ri?
Drejtori i ShSKUK-së do ta ketë pagën më të lartë në këtë sektor, 1470 euro bruto.
Mjeku specialist me ligjin e ri do ta ketë pagën 1260 euro bruto.
Mjeku në specializim ndërkohë do ta ketë pagën 840 euro bruto.
Mjeku i përgjithshëm, stomatologu, farmacisti e mjeku veterinar do ta kenë pagën 777 euro bruto.
Pagat e infermierëve do të sillen pavarësisht kualifikimit dhe kategorizimit nga 588 euro paga më e lartë, kurse më e ulët për ndihmësinfermierin, 472 euro bruto.
Ndërsa kryeinfermieri do ta ketë pagën 672 euro bruto.
Ndryshe, plotësim-ndryshimi i ligjit që i hap rrugën këtyre pagave duhet të votohet edhe në Kuvend. /teve1.info/
https://teve1.info/lajmet/vlera-e-koeficientit-105-keto-do-te-jene-pagat-ne-sistemin-e-shendetesise/
