Kryetari i Komunës së Zubin Potokut, Izmir Zeqiri, në emisionin “Këndi i Debatit” në Tëvë1, ka treguar se si është futur sot në objektin e komunës edhe përkundër përshkallëzimit të situatës që ka ndodhur sot.
Zeqiri, tha se brenda objektit të komunës ka qëndruar gjatë.
“Sot, për mua ishte një ditë e veçantë, ani pse nuk do të kisha dëshiruar që një ditë e punës të fillojë kësisoj, për shkaqe të tensioneve që neve u ballafaquam me to, mirëpo unë në atë moment që është krijuar hapësira për t’u futur në objektin e komunës unë edhe shkova, dhe kanë ndenjur bukur gjatë”, tha ai.
Se si do të veprohet të hënën, a do të paraqitet në objektin e komunës, kryetari tha se pret që do të jetë më e lehtë se në ditën e sotme.
“Me siguri do të paraqitem në objektin e komunës, ani pse nuk e di se si do të jetë agjenda ditore, janë duke punuar në agjendë ditore, mirëpo unë do të jem në objektin e komunës dhe kujtoj që do të shkoj më lehtë se që kam shkuar sot. Ne jemi në përgatitje në plotësimin e stafit të kabinetit tim, kështu besoj që do të fillojmë me punën ashtu siç i ka hije një kryetari të komunës”, tha Zeqiri.
Ndërsa, për vendosjen e flamurit të Republikës së Kosovës në objektin e Komunës së Zubin Potokut, Zeqiri tha se ishte moment i veçantë në jetën e tij.
“Ishte një veçanti edhe në jetën time, sepse deri më tani aty nuk është ngritur një flamur shtetëror. Unë jam krenar që isha në detyrën time të punës dhe bashkë me bashkëpunëtorët e ngritëm flamurin që i takon Republikës së Kosovës. Ne do të përpiqemi të bëjmë punë të madhe, unë e ndjej vetën me të gjitha të drejtat e Kushtetutës, nuk do të ndajmë vija me qeverinë e komunat”, shtoi ai. /teve1.info/
