Autore: Jona Kelmendi
Nuk është vetëm një veturë zyrtare.
Çelësat e kësaj veture do ndryshojnë pronar në diten e Pavarësisë së Kosovës.
E krejt kjo vjen pasi që kryetari i Komunës së Obiliqit, Halil Thaçi, ka vendosur që mjetin e tij zyrtar ta dhurojë për Organizatën e Veteranëve të Luftës së UÇK-së, si donacion për nder të 17 Shkurtit.
E ky veprim nuk është thjesht formalitet.
Thaçi thekson që ata që punojnë për komunitetin meritojnë mbështetje të drejtpërdrejtë.
“Veturën kam vendos ta japë si donacion në shfrytëzim të OVL-UÇK-së këtu në komunën e Obiliqit, unë personalisht për veti mendoj që nuk duhet ta vozisë një veturë që i takon shtetit tonë pra dhe është nga taksat e qytetarëve, një veturë që është më e mirë se vet vetura që e kanë OVL e që në fakt nuk kanë veturë fare. Unë konsiderojë që OVL-UÇK kanë shumë aktivitete e që gjithmonë aktivitetet e tyre i bëjnë nder familjeve të dëshmoreve, martirëve i nderojnë datat tona historike”, ka thënë Thaçi për Tëvë1.
E një gjë e tillë nuk është bërë me herët nga ndonjë kryetar komune.
“Është hera e parë që në Obiliq po merret një vendim i tillë, nuk ka ndodh më parë që OVL-UÇK të përfitojnë një veturë nga komuna. Komuna i ka disa vetura të tjera, meqenëse unë e kam edhe veturën time personale, është pronë e imja dhe unë do shërbehem me të. Për këtë mandat sa do të jem unë kryetar do të kryej shërbimet me veturë personale”, shprehet Thaçi.
Sipas Thaçit veteranet e UÇK-së janë ata që kanë nevojë më së shumti, dhe që kryejnë aktivitete më së shumti.
