Ky flamur valon thellë në fshatin Bistricë të Leposaviqit.
Ai është i vendosur në hyrje të oborrit të shtëpisë së Kryetarit të kësaj komune, Lulzim Hetemit.
Hera e fundit që këtë pamje Hetemi e pa, ishte 29 maji, dita kur për të rruga Bistricë – Leposaviq, u bë njëdrejtimëshe për tash e disa javë me radhë.
Rrugën me kthesa të fshatit të tij, i pari i Leposaviqit nuk e ka përshkuar që nga ajo ditë kur hyri në zyrën e tij të kryetarit.
Nga ajo ditë familja kontaktet me të i mbajnë përmes telefonit.
Vëllai i kryetarit, Bashkim Hetemi, tregon se situata në veri të Kosovës i brengos edhe ata si familje.
Sipas tij, problem janë protestuesit dhe vendimi për dorëheqje i takon vet Lulzimit.
Ata nuk kanë shpresa se praninë e kryetarit në familje do e kenë në festën e Bajramit.
Televizioni ka kontaktuar edhe me partinë Vetëvendosje nga vjen Hetemi, nëse atij do t’i mundësohet që të shkojë në shtëpinë e tij për festën e Bajramit, por gjatë ditës nuk ka marrë përgjigje.
Lulzim Hetemi është i vetmi nga katër kryetarët e komunave veriore, që po qëndron në objektin e komunës që nga dita kur e mori detyrën zyrtare.
